فَهْمُوا كْلاَمِي يا سامْعِينْ
الْوَجْدْ فِيهَا سْبَانِي
وْكُلْ مَا فِيهَا زِينْ
حُبْهَا مَضَّانِي
نْظَرْتْهاَ بَ الْعِينْ
وَعْلِيهاَ غَنَّى لْسَانِي
فيها الطِّيبَة وْقَلْبْ حْنِينْ
زَايَرْهَا مَا يَتَّحْسَبْ بَرَّانِي
فيها سَرْ دْفِينْ
قْرِيتُو وَقْرَانِي
مَا تْشُوفْ فِيهَا يُومْ حْزِينْ
وَرْدَة مَغْرُوسَة فَ جْنَانِي
رِيْحَانْ و ْفُلْ و ْيَا سْمينْ
تاريخْ ارْجَالْها كْفانِي
مَنْ نْسَاهُمْ عْلِيه دِينْ
أَرْضْ الْوَلْيا وَالصالحينْ
بَرَكَتْهُمْ مَا تَخْطَانِي
…………
سَوْلُو عْليها الَعاشْقينْ
شْيوخْ عْلى الْوَعْدة قَايْمينْ
بَ طْعام وَبْرارَدْ وَصْوانِي
الجْدِي يْصَيَّح ْوْالَخروف سْمينْ
وفرسان على خِيلْهُمْ زاهْيينْ
لمحبة فيهم والقلب هاني
إيه على زماني هَجَّرْني
فَ بْحَرْ الغربة رْمَانِي
حَتَّى نْعاسي جْفاني
لَقْبايلْ بها مَدَّاورينْ
فيها هْلي وَقْرانِي
بْشارَةْ الخير ليها حاملينْ
وْ مَرْسالْ مَنْ سيدي احمد جَاني
شيخ الوليا ضَيْ عْيَانِي
………………….
قال مًولْ الحكمة وْ لَمْعانْ
العاشق هايَمْ ف حُبْها وَلْهانْ
كاسو من رْحيقْ لَتْشِينْ وْرُمَّانْ
يا ربي بْ حُرْمَةْ طه العدنان
بَعَّد عليها لَحْزانْ
واحفظها مَنْ الْعَدْيانْ
واجعلها كِي غُصْنْ الْبانْ
وْ رَجَّعْني ليها فرحانْ
نلقى خويا العتروس خضر جنان
وحسن اربيب ف الخير سلطان
ونزور قبر سيدي احمد أبركانْ
الجْدِي يْصَيَّح والخرفان سْمانْ
عند مْوَالينْ لَقْدَرْ والشانْ
ضِيفْهُم مَا يَرْجَعْ جِيعانْ
أرض البطولة والْفُرْسانْ
وَ الْقَايَدْ الْمَنْصُورِي فَ الْمَيْدَانْ
سَالُو لَمْقَدَّم ْحُمَانْ
على بني ورطاس الشُّجْعاَن
كِيفْ طَرْدو فرنسا والاسبان
والْكًروجْ ساق الْغَزْلانْ
ارفع راسْنا فَ البلدان
وأول رئيس حكومة مَنْ أبركان
لَوْ يَنْطَقْ الشْجَرْ وَالجْبَلْ والْكُتْبَانْ
يَحْكي خْبَارْ جْنانْ والْفَدَّانْ
وعن شيبْ وْشُبَّانْ
وعَنْ ناسْ الْهَمَّة مْوَالِينْ الشَّانْ
………….
……………………..
……………..
بقلم الشاعر والزجال : مولاي الحسن بنسيدي علي.
مهداة الى الصديق حسن اربيب ومحمد العتروس
