آهات جريح..

مشتاقين..

وحاة اسم الله مشتاقين
وتعبانين وزهجانين و عاصرين الصبر
لايكين
ومشتاقين

الباعوضة و المطرة …
فتح المجري خوض الطين
ومشتاقين

عشرة ونسة في شارعنا..
جمب الباب
لمة ناس قراب وصحاب
قعدة جبنة في جنبتنا ..
فزعة جمعة في حلتنا..
ضحكة جميلة ..
قعدة طويلة ..
ونسة زولك الكضاب

حفلة حنة ..
شيلة فاتحة ..
لمة دفعة ..
قلدة مع صحاب غاليين
و مشتاقين

ونسة حنينة من امي ..
كهرباء قاطعة ..
رقدة حوش
و شاي مغرب ..
عشاء الدكان..
وصحن البوش

رجعة صاحبك الغائب ..
لمة ناس في شارع النيل
ضحكة تقالد القمرة ..
سحاب نائم في حضن الليل
و نجمة تغازل المقرن..
ونجمات في العشق رايحين
ومشتاقين

يا بحرينا..
يا املاكنا يا حلفايا يا شعبية
مشتاقين ..
يا جيلينا يا كافوري يا ختمية
مشتاقين ..
يا شمباتة
يا حواتة
يا تواتة
مشتاقين ..
بيت المال و نمرة ٢ وناس بري
ناس العودة شارع افريقيا
ناس بانت وشارع الوادي
ناس عابدين
ومشتاقين..

يا خرطومنا مشتاقين ..
يا كل الصحاب و اللمة مشتاقين
و يا ساكنين حنايا القلب مشتاقين
ويا قاسمين معاي الطيبات و الشين
وحاة اسم الله مشتاقين ..

ويا راجين
علي ضفة مراسي الشوق ..
ومنتظرين
متين ترجع بلدنا تضوي زي اول ..
وتتراقص بيوت الطين
متين نملأ الشوارع حب و نرسم بي خيوط النور ..
و نتطايب..
ونتصافا ..
متين تتسالم الايدين ويطيب الخاطر المكسور ..
ونتقالد ..
و نتعافا ..
متين كل الجروح تبرأ..
وتطيب اراوحنا نتشافا

متين يتقابلوا الغائبين
ومشتاقين