حاجه توجع

لما أنت تخلى دارك
والدموع في عيون صغارك..
تمشي أنت ويمشي جارك..
وماكَ عارف أمتي ترجع..
حاجة توجع
***
لما نيلنا يكون بيجري
ولما دمنا جوه بغلي
وكل أفراحنا بتغادر
ونحنا بنقول ليها بدري
يا ربوع بلدي الحبيبة
حاجة توجع

***

لما تصبح وأنت حاير
وِمَأّ بِحَلِّق فِّوقنا طايِر
وما بنسمع في ديارنا
غير قنابل وصوت ذخاير
ناس تموت شان مافي جرعة ..
وناس تموت من دون مقابر
حاجة توجع
***

لما تدمر بلادك
والغريبة بِيَد ولادك
بس عشان كرسي السيادة..
شالوا بندق وشالوا مدفع..
وللأسف ما خسروا حاجة
الحساب دفعو شعبك.
حاجه توجع
***

لما كل جيران بلادي
المعابر يقفلوها
وكان زمان لمن يجونا
حتي أحزانهم نشاطر
لا جواز لا حتي رخصة
وما بنسجل في الدفاتر
حاجة توجع
***

الله أكبر يا بلادي
الله أقوى وهو ألطف
وهو قادر
ينتقم من كل جائر
وكل اول ليهو آخر
كل أول ليهو آخر
الله قادر ..